Siglir tar il cuntegn
cuntegn

Naziunal/Internaziunal Passlung: Philip Furrer trenescha ils sprinters svizzers

In svizzer cun ragischs finlandaisas che viva en Norvegia: Quai è il nov trenader da sprint da l'equipa svizra da passlung. Num ha el Philip Furrer ed el suonda a Rafael Ratti da Madulain, ch'è sa retratgs suenter mo in onn. Ratti lavura da nov sco scolast da sport a l'universitad da Friburg.

Philip Furrer, il nov trenader da sprint dals passlungists svizzers.
Legenda: Philip Furrer - el è il nov trenader da sprint dals passlungists svizzers Swiss Ski

Il nov trenader da sprint Philip Furrer è sez stà atlet. Il passlungist, ch'è creschì si ad Ursera/Andermatt, è stà in dals emprims en Svizra ch'è sa deditgà a la disciplina sprint. Quella giada era sprint anc ina disciplina giuvna.

Parallel tar sia carriera ha Furrer fatg ad Altdorf e Rickenbach la scolaziun da scolast primar. Suenter in camp da trenament en Norvegia ha el decidì cun 22 onns d’emigrar e da restar en il nord.

Indesch enstagl da mo dus onns en Norvegia

En Norvegia ha Philip Furrer studegià a la renumada scola da sport da Meråker. Enstagl da turnar sco previs suenter dus onns en Svizra è Furrer restà – pervia da l’amur. Ed uss viva el gia dapi indesch onns là. Blers onns haja el manà là ina vita tut normala ed haja lavurà sco scolast da sport en in gimnasi, raquinta el en l'intervista cun Radiotelevisiun Svizra Rumantscha RTR.

Engaschi per la famiglia enstagl per il sport

Indesch onns en Norvegia, en la patria dal sport da passlung. E tuttina n'èsi betg ì ensi cun la carriera da sportist. Era pervia da differentas tragedias en famiglia. Omadus geniturs da sia amia èn morts entaifer mo dus onns pervi da cancer. Philip Furrer e sia amia han gì da surprender quasi la rolla da geniturs da la sora giuvna. Uschia saja il sport stà main impurtant.

Via la Gronda Bretagna enavos en Svizra

Philip Furrer filmescha Jöri Kindschi, in da ses atlets
Legenda: Philipp Furrer filmescha a Jöri Kindschi, in da ses atlets. Swiss Ski

Avant in onn ha Philip Furrer lura survegnì l'offerta da trenar la pitschna equipa da passlung da la Gronda Bretagna cun Andrew Young ed Andrew Musgrave. Cun ils dus scots, che vivan sco Furrer gia dapi onns en Norvegia, ha Furrer ha gì immediatamain success.

Quai ha avert ad el la porta tar Swiss-Ski. Indesch onns suenter ch'el è emigrà en Norvegia è Philip Furrer daventà nov trenader da sprint da l'equipa svizra da passlung.

L’emprima cursa en Svizra è il sprint en il rom da Tavau Nordic, dumengia, ils 11 da december 2016.

Sportissimo 17:00