Siglir tar il cuntegn
cuntegn

Naziunal/Internaziunal Passa 11'000 persunas al «Super10Kampf» a Turitg

La concurrenza divertenta en favur da l'agid da sport svizzer ha pudì rimnar radund 600'000 francs. I è stà la 38avla ediziun dal «Super10Kampf».

18 atletas ed atlets svizzers han fatg part a la concurrenza. Tranter auter il ciclist Fabian Cancellara, la triatleta Nicola Spirig, la gimnasta Giulia Steingruber u ils anteriurs skiunzs Didier Cuche e Marco Büchel. La concurrenza cun elements sco emplunar craps da Tetris, absolver in percurs sin rullettas ubain far part ad ina lecziun da aerobic en costums dals onns 80 ha persvadì il public.

Onuraziuns per 10 sportists

Dasper la concurrenza da divertiment èn stadas en il center undraziuns dals sportists che han gì success a Rio de Janeiro. Dals 13 atlets che han gudagnà medaglias han 10 survegnì ina distincziun. Dasper Fabian Cancellara èn vegnids undrads: Heidi Diethelm-Gerber, Nicola Spirig, Giulia Steingruber ed il quartet da rembladers Mario Gyr, Simon Niepmann, Simon Schürch e Lucas Tramèr. Ultra da quai han ils dus atlets dal Paralympic Tobias Fankhauser e Marcel Hug pudì prender encunter l'onuraziun.

RR novitads 6:00