Siglir tar il cuntegn
Inhalt

Naziunal/Internaziunal Nino Schurter trenescha per sia terza medaglia olimpica

Suenter la medaglia da bronz 2008 a Beijing e quella d’argient 2012 a Londra vul Nino Schurter gudagnar a Rio de Janeiro sia terza medaglia olimpica. Sche pussaivel quella dad aur che manca anc ad el. Anc bun dus mais ha il mountainbiker temp per sa preparar sin il punct culminant da la stagiun.

Nino Schurter en acziun
Legenda: Nino Schurter en acziun. Keystone

Nino Schurter è en buna furma. Quai ha il campiun mundial actual demonstrà a las emprimas duas cursas da la cuppa mundiala. Quellas ha el gudagnà. La dumengia vargada ha Schurter dentant stuì sa cuntentar cun il quart plaz. Suenter ina cupitgada e dus defects ha el manchentà il podest a La Bresse. Ina raritad. L’ultima giada che Nino Schurter n’è betg stà sin il podest cura ch’el è partì en la cuppa mundiala è stà avant dus onns, era lura era el vegnì franà d’in defect.

Campiunadi mundial, lura Lai e suenter Rio

Ils proxims mais stat il trenament en il center. Nino Schurter parta mo a paucas cursas. Tranter quellas dentant trais impurtantas. Ils 3 da fanadur emprova Nino Schurter da defender a Nove Mesto na Morave en Tschechia ses titel da campiun mundial, mo in’emna pli tard parta Schurter lura en sia stretga patria a la cursa da la cuppa mundiala a Lai ed ils 21 d’avust suonda lura la cursa olimpica da cross country a Rio de Janeiro. Avant la cursa olimpica fa Schurter anc in bloc da trenament en l’autezza.

Schurter experimentescha cun rodas pli grondas

Sin il pli aut livel dal sport da mountainbike è era il material da gronda impurtanza. Las ultimas duas cursas è Nino Schurter partì per l’emprima giada cun rodas in pau pli grondas ch’usità, cun rodas da la dimensiun da 29 poleschs. La gronda part da ses concurrents parta gia dapi in temps cun talas rodas. Fin qua è Schurter parti cun rodas in pau pli pitschnas da 27 poleschs e mez. Cunquai che la cursa olimpica a Rio saja vaira sperta, sajan las rodas pli grondas d’avantatg, di Schurter. El stoppia dentant anc s’endisar vid la nova dimensiun.

Puspè betg a la festa d’avertura

Sco gia a Beijing ed a Londra manchenta Nino Schurter era als gieus olimpics a Rio la festa d’avertura ch`è ils 5 d’avust. La cursa da mountainbike cross country è numnadamain pir varga duas emnas pli tard, l’ultim di dals gieus, ils 21 d’avust. Schurter nizzegia perquai il temp per trenar e sgola pir circa in’emna avant la cursa olimpica en Brasilia. La medaglia dad aur olimpica è la suletta che manca anc en il palmarès impressiunant da Nino Schurter. Gia 4 giadas è el vegnì campiun mundial da l’elita ed era 4 giadas ha el gudagnà la cuppa mundiala da mountainbike.

RR actualitad 17:00