Siglir tar il cuntegn
Inhalt

Naziunal/Internaziunal Nino Schurter franà al cumenzament da la stagiun

Suenter la stagiun perfetga dal 2017 è il meglier mountainbiker dal mund, Nino Schurter, vegnì franà in zic en las emprimas cursas da la nova stagiun.

Nino Schurter avant Sam Gaze
Legenda: Nino Schurter cun ina curta show er durant la cursa da la cuppa mundiala en l'Africa dal Sid. Keystone

En l’emprima cursa da la cuppa mundiala a Stellenbosch en l’Africa dal Sid è Nino Schurter daventà per ina giada be segund. Il mountainbiker da Tersnaus ha pers il sprint final cunter il giuven Sam Gaze da la Nova Zelanda. Bun in’emna pli tard han Schurter e ses collega Matthias Stirnemann stuì dar si il Cape Epic gia suenter l’emprima etappa, quai pervi d’ina infecziun tar Stirnemann.

I sto constar tut per esser sisum il podest

Nino Schurter ha mess avant in zic auter il cumenzament da la nova stagiun. Tuttina resta il campiun mundial e campiun olimpic optimistic per il 2018 e Schurter è persvadì ch’el vegn er da restar a la testa quest onn, malgrà il squitsch dals giuvens ed il cletg ch’ha mancà durant las emprimas cursas.

Finamira èn ils campiunadis mundials da chasa

Avant in onn aveva Nino Schurter gudagnà tut quai ch’el ha pudì gudagnar: Per l'emprima giada ha el triumfà al Cape Epic, ina da las pli diras cursas da mountainbike sur pliras etappas. Plinavant ha el gudagnà mintga cursa da la cuppa mundiala ed a la fin da la stagiun è il sportist da 31 onns anc daventà a Cairns en l’Australia per la 6avla giada campiun mundial. Quest titel vul el er defender quest onn. Ils campiunadis mundials 2018 èn numnadamain l’entschatta settember a Lai, quasi avant l’isch-chasa da Nino Schurter.

RR actualitad 07:00