Nino Schurter betg da franar en la cuppa mundiala

Il mountainbiker grischun Nino Schurter resta ina classa per sasez. Schurter ha er gudagnà la 5avla cursa da la cuppa mundiala en questa stagiun. L'actual campiun mundial e campiun olimpic ha triumfà a Mont Sainte-Anne en il Canada.

Il mountainbiker Nino Schurter

Legenda da maletgs: Nino Schurter durant il campiunadi svizzer mez fanadur. Keystone

Nino Schurter ha gudagnà cun in avantatg da 10 secundas sin il Franzos Stéphane Tempier, e 21 secundas avant il Talian Gerhard Kerschbaumer. Per la decisiun ha Schurter procurà en la 5avla da 7 rundas, cura ch'el è vegnì da scappar da ses davos concurrents.

Ina buna prestaziun ha er il Svizzer Mathias Flückiger mussà. Malgrà ch'el ha pers bunamain duas minutas, è el vegnì 7avel. Cun Reto Indergand ha anc in ulteriur Svizzer cuntanschì sco 10avel in plaz en ils top 10.

Schurter scriva istorgia

Nino Schurter è l'emprim mountainbiker insumma che gudogna tschintg cursas da la cuppa mundiala en seria. E grazia al triumf en il Canada gudogna el er quest onn la cuppa mundiala generala.

La fin d’avust stat sin il program la davosa cursa da la cuppa mundiala en la Val di Sole en l'Italia. L'entschatta settember suonda lur anc il punct culminant, ils campiunadis mundials da mountainbike a Cairns en l'Australia. Là vul Nino Schurter defender ses titel da campiun mundial.

Nagina schanza per las Svizras

En absenza da Jolanda Neff, che n'è betg fitta ed ha perquai desistì sin il viadi en il Canada, ha Alessandra Keller procurà per la meglra rangaziun da las Svizras. El daventa 9avla, cun in retard da pli che trais minutas. Linda Indergand daventa 10avla, e Corina Gantenbein 12avla.

La mountainbikera Jana Belomoina

Legenda da maletgs: Jana Belomoina durant la cursa da la cuppa mundiala a Lai avant paucas emnas. Keystone

Sia terza victoria da la stagiun, ha Jana Belomoina da l'Ucraina pudì festivar a Mont Sainte-Anne. Ella gudogna avant la Franzosa Pauline Ferrand-Prévot e la Canadaisa Catharine Pendrel. Cun questa victoria ha Belomoina era gia segirà la trofea dal classament general da la cuppa mundiala.

RR novitads 23:00