Siglir tar il cuntegn
cuntegn

Naziunal/Internaziunal Nibali gudogna, Quintana attatga Froome

Il victur dal Tour de France da l’onn passà, Vincenzo Nibali ha gudagnà la terzultima etappa dal Tour da quest onn. Nairo Quintana, il segund en il classament general, ha prendì suenter mesa minuta sin il leader Chris Froome. La decisiun tgi che gudogna il Tour 2015 croda la sonda sin l’Alp d’Huez.

Il ciclist talian Vincenzo Nibali ha demonstrà oz sias qualitads da raiver.
Legenda: Il victur dal Tour de France da l’onn passà, Vincenzo Nibali ha gudagnà la terzultima etappa dal Tour 2015. Keystone

Il ciclist talian, Vincenzo Nibali ha demonstrà oz sias qualitads da raiver. Il victur dal Tour de France 2014 ha gudagnà solo la 19avla etappa dal Tour 2015. Curt avant l’ultima ascensiun a La Toussuire, ha Nibali laschà star ses ultim concurrent, il Franzos Pierre Roland. Lez manava la cursa fin che Nibali ha pudì suenter ad el en l’ultima cursa a val da l'etappa dad oz – la terza etappa en las Alps.

Quintana ha fatg bun temp

Il leader Crhis Froome n’ha betg pers bler temps. Il Columbian Nairo Quintana ha attatga Froome en l’ultima ascensiun. Il Brit n’ha dentant betg laschà distanziar el memia fitg. La fin finala ha Froome pers «be» ina mesa minuta sin Quintana en l’arrivada, uschia ch’el ha anc in avantatg da 2:38 minutas sin il Columbian. Vul Nairo Quintana gudagnar anc il Tour de France, sto el lantschar l’attatga decisiva damaun sonda durant l’ascensiun sin la Alp d’Huez.

Frank da nov sin plazza 7

Ina buna prestaziun ha ina giada dapli mussà il Svizzer, Mathias Frank. Il ciclists da l’equipa IAM è vegnì 14avel cun in retard da 5:02. El è ussa 7avel en il classament general, cunquai ch’il Brit Geraint Thomas ha pers bler temp en l’etappa dad oz.

RR novitads 18:00