Mo duas emnas suenter il pli grond success en la carriera da Nevin Galmarini, la victoria tar ils gieus olimpics da PyeongChang, curunescha il snowboardist sia stagiun cun la victoria da la cuppa mundiala generala. Indesch onns suenter Philipp Schoch gudogna uschia puspè in snowboardist Svizzer la cuppa mundiala generala. Puspè è in Svizzer il meglier da l’entira stagiun.
Terza plazza a Scuol ha tanschi
La cuppa mundiala da snowboard alpin a Scuol e stada l’emprima suenter ina pausa da tschintg onns en la stretga patria da Nevin Galmarini suenter la victoria da la medaglia d'aur olimpica. En «ses» territori da skis ha Galmarini vulì porscher ina «show» a ses fans. Cun terminar la cursa da chasa sin plazza trais è quai era gartegià. Anc pli impurtant che la plazza da podest è dentant il fatg ch'il campiun olimpic ha gudagnà la culla da cristal gronda per il classament general da la cuppa mundiala da snowboard.
Er tar las dunnas in terz rang
En la cursa da las dunnas è Ladina Jenny vegnida per la segunda giada questa stagiun sin il podest. Grazia al success en il final pitschen cunter l'Austriaca Claudia Riegler è la Son Gagliaisa vegnida sin il terz plaz.
Scuol – puspè il Mecca da snowboard en Svizra
Sin la muntogna nua che tut ha cumenzà po Nevin Galmarini festivar ses pli grond success. En Engiadina Bassa ha Galmarini cumenzà cun il sport da snowboard. En l’Engiadina Bassa è vegnida fundada l’onn 1986 l’emprima scola da snowboard. Cun ils frars Cla e Fadri Mosca han ils emprims snowboardists Svizzers fatg furora sin livel internaziunal. Cla Moscà ha festivà l’onn 1993 il titel da campiun mundial. Ses frar pli giuven Fadri Mosca ha cuntanschì quella finamira l’onn 1997. Tar ils gieus olimpics a Nagano l’onn 1998 è Fadri Mosca stà il grond idol da Nevin Galmarini.
RR Sportissimo 17:00
