Jolanda Neff ha propi laschà a Huskvarna en Svezia gnanc ina suletta schanza a la concurrenza en la cursa da cross country. La ciclista da 23 onns ha dominà la cursa da la partenza fin l'arrivada ed ha la finala triumfà cun in avantatg da 3:39 minutas avant Annika Langvad dal Danemarc. Terza è la Tudestga Sabine Spitz vegnida cun in retard da bunamain 6 minutas.
Ina buna prestaziun ha è la Grischuna Corina Gantenbein da Claustra mussà. Ella è vegnida 6avla cun in retard dad 8 minutas sin la victura Jolanda Neff ch’astga turnar a chasa cun duas medaglias dad aur. Gia l’emprim di veva la dominatura en il sport da mountainbike gudagnà aur cun la staffetta svizra en il uschenumnà Team Relay.
Absalon – tgi auter
En la cursa d'elita dals umens ha il Svizzer Fabian Giger gudagnà argient. Gia per la secunda gia suenter il 2014 astga Giger uschia sa numnar vicecampiun d'Europa en la disciplina cross country. Sisum il podest il grond favurit, il Franzos Julien Absalon ch'è stà 1:41 minuta pli sperts che Fabian Giger. Terz cun in retard da bunamain duas minutas e mesa il tschec Ondrej Cink. Cun Martin Fanger sco quart, Matthias Stirnemann sco 5avel e Lukas Flückiger sco 7avel èn anc trais ulteriurs svizzers classads en ils top 10.
Nino Schurter che vess er udì tar ils gronds favurits n’è betg stà a la partenza sco er betg il tschec e campiun olimpic da Londra Jaroslav Kulhavy.
Andrin Beeli 23avel tar ils U23
Ina medaglia svizra hai er dà tar ils giuvens U23. Marcel Guerrini è vegnì terz davos in duo franzos. Viktor Koretzky ha gudagnà aur avant Titouan Carod. Segund meglier svizzer è vegnì Andri Frischnknecht, il fegl dal pionier da mountainbike en Svizra Thomas Frischknecht, quai sco 8avel. Andrin Beeli da Sagogn ha pers bun 9 minutas sin il pli spert ed è vegnì 23avel. Beeli ch'ha stuì parter en la davosa retscha ha gì la finamira da cuntanscher in plaz sut ils top 25, quai ch'è la finala reussì al giuven Sursilvan.
RR novitads 14:00