National League - HCD dat ina lecziun als Lakers

audio

Davyd Barandun dal HCD davart emprima victoria, Joe Thornton e Corona

02:56 min, ord Actualitad dals 18.10.2020.

laschar ir. Durada: 2 minutas 56 Secundas.

Il HCD ha mussà ina reacziun suenter las duas terradas en la Svizra Franzosa encunter Genevra Servette (2:5) e Losanna (3:4). En ses emprim gieu avant ils fans da chasa ha l'equipa da Christian Wohlwend declassà ils Rapperswil-Jona Lakers gist cun 9:2.

audio

Andres Ambühl, chapitani HCD, davart ses hattrick e la crisa da Corona

02:13 min, ord Actualitad dals 18.10.2020.

laschar ir. Durada: 2 minutas 13 Secundas.

Per la show n'ha dentant betg Joe Thornton procurà, mabain las pitgas che dattan dapi onns tar Tavau, tranter auter il capitani Andres Ambühl ch'ha sajettà ils gols al 2:0, al 3:0 e quel al 8:2. Ils ulteriurs gols per Tavau han sajettà Benjamin Baumgartner (1:0), Magnus Nygren (4:0), Marc Wieser (5:0), Perttu Lindgren (6:2), Enzo Corvi (7:2) e Simon Knak (9:2).

Legenda: Joe Thornton, la legenda canadaisa è enavos en il dress dal HCD. Keystone

Emprim gieu cun Joe Thornton

La legenda da 41 onns ha dà ses emprim gieu per il HCD dapi il 2012. Il Canadais ha gia dà durant la stagiun 2004/2005 e 2012/2013 per Tavau. Ils ultims onns ha il giugader da la NHL adina trenà durant la stad tar ils Grischuns. Cunquai che la stagiun en l'America dal Nord cumenza il pli baud il schaner 2021, vegn Joe Thornton a dar tochen fin lura tar il club da hockey da Tavau.

Joe Thornton è ina legenda dal hockey mundial. Cun il Canada è el daventà campiun olimpic e campiun mundial. En la NHL ha el dà var 1600 gieus ed è vegnì onurà in onn sco meglier giugader da la liga.

Legenda: Controllas, mascras, distanza, etc. – durant il temp da Corona è tut in zic auter dad ir a mirar hockey. Keystone