Ina a spetgà in gieu offensiv, la finala hai strusch dà ina schanza da gol en il Parc des Princes tranter il PSG e Real. Tant Cristiano Ronaldo da Madrid sco er Zlatan Ibrahimovic n’han betg pudì mussar lur classa e procurar per ina decisiun.
En il segund gieu da la gruppa A ha Malmö battì a chasa Schachtar Donezk cun 1:0. Il sulet gol ha sajettà Markus Rosenberg en la 17avla minuta. En la tabella mainan Real e PSG cun 7 puncts avant Malmö cun 3 puncts. Schachtar Donezk n’han anc gudagnà nagins puncts en ils emprims trais gieus da la Champions League.
Wolfsburg suveran
En la gruppa B ha il VfL Wolfsburg surpiglià la testa da la tabella. Il club da la Bundesliga ha gudagnà a chasa encunter Eindhofen cun 2:0 grazia ad ina ferma segunda mesadad. Curt avant la fin han il goli dal VfL, Diego Benaglio, tegnì in penalti.
Il duel tranter il ZSKA Moscau e Manchester United è i a fin 1:1. Doumbia ha sajettà ils Russ gia en la 15avla minuta en avantatg. En la 65avla minuta ha Martial pudì egualisar per Manu.
Galatasaray volva il gieu
En la gruppa CD ha Galatasaray Istanbul gudagnà encunter Benfica Lissabon cun 2:1, quai suenter ch’ils Portugais èn ids en avantatg cun 1:0 gia en la segunda minuta. En l’auter gieu ha Atletico Madrid declassà l’equipa dal Kasachstan Astana cun 4:0. A la testa da la tabella figureschan Benfica ed Atletico mintgamai cun 6 puncts.
De Bruyne procura per la decisiun
Il star da la Belgia, Kevin de Bruyne, ha salvà a chasa ils trais puncts per sia equipa, Manchester City. De Bruyne ha sajettà en la 91avla minuta il 2:1 per City encunter Sevilla. Il club spagnol era ì suenter mes’ura cun 1:0 en avantatg. Anc avant pausa ha Manchester City dentant pudì egualisar.
Nagins gols hai dà en il duel tranter Juventus Turin e Borussia Mönchengladbach. Pauca lavur en quest gieu ha er giu il goli da Borussia, Yann Sommer. Per l’equipa tudestga è quai l’emprim punct en la Champions League. Juve resta vinavant a la testa da la tabella, in punct avant City.
RR novitads 06.00