Siglir tar il cuntegn

Header

cuntegn

Naziunal/Internaziunal Nagin «Cuira - Arosa» senza Toni Zarn

Dapi l'emprima ediziun da «Cuira - Arosa» l’onn 1981 fin la 36avla da quest onn ha Toni Zarn manchentà gnanc ina suletta. U sco ciclist activ ni sco funcziunari.

Blers onns ha Toni Zarn fatg la cursa da velo da Cuira ad Arosa sco ciclist activ. Suenter quella fasa activa è el stà gidanter. L’emprim ha el manischà l’auto da scua che rimna ils ciclists che na pon betg fin sisum, lura è el stà en la giuria, è stà chau-cursa e dapi 6 onns ès el president dal comité d’organisaziun.

Dapi decennis batta il cor da Toni Zarn per il sport da velo

audio
Bunura: «Cuira - Arosa» senza Toni Zarn na datti betg
ord Actualitad dals 09.09.2017.
laschar ir. Durada: 2 minutas 5 Secundas.

Toni Zarn è ina instituziun en il sport da velo dal Grischun. Da giuven era el sez in ciclist passiunà e dapi decennis s’engascha el sco funcziunari per ses sport preferì. Tranter auter ha el organisà il 2002 e 2008 duas etappas dal Tour de Suisse a Domat. Dapi 6 onns è Zarn president dal RMV Cuira, il pli grond club da velo e mountainbike dal Grischun. Exact tuttina ditg è el era president dal comité d’organisaziun da la cursa Cuira – Arosa.

Victurs prominents sco Breu, Rominger e Zülle

Il pli gugent sa regorda Toni Zarn dals onns 80 e 90. Lura eran tut ils buns profis svizzers a la partenza. La glista da victurs cumpiglia campiuns olimpics e mundials, victurs dal Giro d’Italia e da la Vuelta ni victurs d’etappa al Tour de France. Beat Breu, Tony Rominger, Alex Zülle ni Pascal Richard èn mo intgins exempels da victurs prominents da Cuira – Arosa. Oz partan plitost sportists da hobi cun ambiziuns ed era ferms ciclists giuvens ed adina pli bleras dunnas.

Dumber da participants è pli u main constant

Dumengia partan puspè tranter 200 e 300 ciclistas e ciclists ed emprovan da dumagnar uschè spert sco pussaivel las 365 storschas fin ad Arosa, bunamain 30 kilometers cun 1’200 meters differenza d’autezza.

RR actualitad 06:00

Artitgels legids il pli savens