Siglir tar il cuntegn

Naziunal/Internaziunal Murray sa separa puspè da Lendl

Il giugader da tennis da la Scozia Andy Murray sa separa puspè da ses trenader Ivan Lendl. Quai suenter bun in onn.

Ivan lendl ed andy murray
Legenda: Il Scot Andy Murray (dretg) sa separa puspè da ses trenader Ivan Lendl (san.). Keystone

Andy Murray e ses trenader Ivan Lendl – omadus anteriurs numers 1 dal mund da tennis – van en l’avegnir vias separadas. El engrazia a Lendl per ses sustegn e cussegl, el haja pudì emprender bler, scriva Andy Murray sin sia homepage. Els sa separian en cunvegnientscha vicendaivla.

Actualmain è Murray reconvaleszent e planisescha ses comeback per il schaner che vegn. Lura vul el giugar a Brisbane, per il mument senza trenader e cun la squadra existenta.

Dapli success cun Lendl sco trenader

Ivan Lendl aveva gia trenà Murray tranter dal 2011 fin il 2014. Quel temp ha Murray gudagnà il US Open, il turnier olimpic a Londra (2012) ed il turnier a Wimbledon (2013). Suenter ha midà Murray tar la trenadra Amélie Mauresmo. L'onn passà è'l puspè turnà tar Lendl, ha gudagnà Wimbledon ed il segund aur olimpic a Rio de Janeiro.

RR novitads 09:00