Grazia ad in spurt en la fasa finala da la cursa a Snowshoe en ils Stadis Unids, gudogna Lars Forster 5 secundas avant Nino Schurter. Il Grischun ha manchentà ina 33avla victoria en la cuppa mundiala pervi d'in defect. Terz daventa il Franzos Maxime Marotte.
La victoria en il classament general aveva Nino Schurter gia segirà il venderdi, cun si'emprima victoria en ina cursa da short track.
Discletg per Jolanda Neff
En il davos mument manchenta la Svizra Jolanda Neff – da gudagnar per la quarta giada il classament general da la cuppa mundiala dal mountainbike.
Betg propi fitta, finescha Neff la davosa cursa dal cross country da la stagiun a Snowshoe en ils Stadis Unids sin plazza 11. Uschia tanschi a l'Americana Kate Courtney da daventar tschintgavla, per gudagnar il classament general.
La victoria da la cursa da la dumengia, va a la campiunessa mundiala la Franzosa Pauline Ferrand-Prévot.
RR novitads 23:00