La revantscha suenter ses 9avel plaz avant in'emna a Leogang e gartegiada. En in cursa plain tensiun ha Nino Schurter gudagnà il titel da campiun d'Europa, quai grazia ad in'acziun spectaculara curt avant l'arrivada. Avant la davosa descensiun ha il mountainbiker oriund da Tersnaus mess tut sin ina carta e cun in manever ristgus anc surpassà ses pli grond concurrent Titouan Carod ch'è quasi adina stà sin il chaltgogns a Schurter en questa cursa. Igl è stà la scena decisiva.
Cun Mathias Flückiger ha anc in segund Svizzer cuntanschì in plaz da podest. Flückiger, avant in'emna daventà vicecampiun mundial, ha gudagnà al campiunadi europeic da chasa la medaglia da bronz.
Discletg per Colombo
Il matadur local, il Tessinais Filippo Colombo ch'è da chasa a Bironno, mo paucs kilometers davent dal traject da cursa, è ditg stà en la gruppa da testa enfin ch'in defect tecnic ha la finala bittà lunsch enavos il giuven da 22 onns. Colombo che vala sco ina da las grondas speranzas svizras per l'avegnir absolva sia emprima stagiun tar l'elita.