Suenter ils onns 2015, 2016 e 2018, è quai la quarta giada che Jolanda Neff vegn campiunessa europeica. Quest onn a Brünn en la Tschechia, distanziescha la Svizra da 26 onns Jana Belomoina da l'Ucraina per bunamain trais minutas. Terza daventa la Tudestga Elisabeth Brandau.
Vogel procura per ulteriura medaglia svizra
Tar l'elita dals umens ha il Svizzer Florian Vogel gudagnà argient, ed è uschia daventà vicecampiun. Gudagnà il titel ha Mathieu Van der Poel dals Pajais Bass.
Er ils giuvens fan ina medaglia
In'ulteriura medaglia svizra hai era dà en la categoria U23. Il Tessinais Filippo Colombo gudogna argient. Als dus mountainbikers sursilvans ch'èn stads a la partenza n'èsi dentant betg gartegià da realisar dal tut lur finamiras.
En tut ha l'equipa svizra da mountainbike uschia gudagnà quatter medaglias d'aur e trais d'argient al campiunadi europeic en la Tschechia.
Vital Albin ha cumenzà ferm
El aveva avisà in plaz tranter ils megliers diesch, terminescha la cursa europeica sco 16avel. Betg dal tut quai ch'il mountainbiker da Tersnaus vuleva. Tuttina è el cuntent. Las emprimas duas rundas è Vital Albin stà davontiers. Lura ha el stuì dosar ses tempo.
Ses focus è uss cumplainamain sin las proximas duas fin d'emnas, cun duas cursas da la cuppa mundiala a Val di Sole ed a Lai. Finalmain dumagnar là en ils top 10, è sia finamira.
La sanadad da Ursin Spescha
Ursin Spescha ha ina bloccada dal dies ch'ha impedì ses 15avel plaz avisà, a sia emprima EM en la categoria U23. El saja partì bain e fin la mesadad da la cursa sa tegnì enturn il 20avel plaz. Lu è la bloccada en il dies vegnida pli ferma. Il mountainbiker da Sevgein ha tuttina murdì sin ils dents, e vulì terminar la cursa. El vegn 33avel cun in retard da 7 minutas sin il campiun europeic dals U23, Vlad Dascalu da la Rumenia.
Dumagnar davent tant pli spert questa bloccada en ses dies ha uss prioritad. Pertge Ursin Spescha vul en scadin cas parter en in'emna a la proxima cursa da la cuppa mundiala en l'Italia. Ed il pli tard en duas emnas, tar la cursa da chasa a Lai, vul el esser fit e persvader cun in bun resultat.
RR novitads 14:00++
