Siglir tar il cuntegn
Inhalt

Naziunal/Internaziunal Mo Brem è stada pli sperta che Gut

Lara Gut è vegnida segunda al slalom gigant a Courchevel. La skiunza tessinaisa ha danovamain mussà ina fitg buna cursa e la finala pers sulet 17 tschientavels sin il meglier temps da l'Austriaca Eva-Maria Brem. Lara Gut parta il segund plaz cun la Norvegiaisa Nina Loeseth.

Suenter las victorias en la supercumbinaziun ed en la cursa rapida, vegn Lara Gut segunda dal slalom Gigant.
Legenda: Suenter las victorias en la supercumbinaziun ed en la cursa rapida, vegn Lara Gut segunda dal slalom gigant. Keystone

Lara Gut è en furma avant Nadal. Suenter ch’ella ha gudagnà il venderdi la supercumbinaziun ed ier sonda la cursa rapida a Val d'Isère, cuntanscha ella era a Courchevel in plaz da podest en il slalom gigant. Igl è pia il terz plaz da podest en trais dis.

Manchentà tripletta

Per la tripletta, pia da gudagnar trais cursas en seria, han be 17 tschientavels mancà a la skiunza tessinaisa. Ella maina persuenter ussa il classament general cun 558 puncts: 58 puncts avant l’Americana Lindsey Vonn ch’è be vegnida 13avla en il slalom gigant dad oz dumengia. Dasper Lara Gut è mo in ulteriura Svizra sa qualifitgada per il segund percurs. Wendy Holdener è daventada 22avla.

Segunda victoria per Brem

Eva-Maria Brem, la victura dal slalom gigant a Courchevel, era gia en l’emprim percurs stada la sperta – lura dentant be 9 tschientavels pli sperta che Gut. L’Austriaca n’ha dentant betg laschà irritar da la buna prestaziun da Lara Gut ed è era stà en il segund percurs pli sperta che la Svizra.

Per Brem è quai stà la segunda cursa da la cuppa mundiala ch’ella gudogna. Ina victoria che porta ella era a la testa dal classament da disciplina dal slalom gigant. Suenter 4 da 9 slaloms gigants maina l’Austriaca 42 puncts avant Lara Gut.

RR novitads 15:00