Siglir tar il cuntegn

Header

Navigaziun

cuntegn

Naziunal/Internaziunal Missiun delicata per la naziunala Svizra

6 victorias en ils 9 gieus da preparaziun - cun quella bilantscha è la naziunala svizra sgulada direcziun Moscau. La confidenza è gronda avant il campiunadi mundial.

naziunala svizra da hockey sin glatsch
Legenda: La Svizra n'auda betg tar ils top favurits, è dentant buna per ina surpraisa. Keystone

Mo ussa cumenza tut tar nulla, ils gieus da preparaziun na dumbran nagut pli. Ils davos onns èn ils Svizzers vegnids intginas giadas sut las rodas al campiunadi mundial suenter ch'els vevan fatg ina buna figura en la preparaziun. La missiun a Moscau è pia delicata, mo la finamira è clera. La Svizra mira da gieu tar gieu e vul ina gia cuntanscher il quartfinal, quai la finamira minimala. Silsuenter è tut pussibel sco gia il 2013 cura ch'ils Svizzers eran vegnids franads pir en il final da la Svezia.

Blers debutants e giugaders dal HCD

La naziunala Svizra ha fatg il viadi en Russia cun in’equipa giuvna. Gist 9 giugaders èn debutants, dattan pia l’emprima gia in campiunadi mundial cun ils gronds. La gronda delegaziun vegn da Tavau. Dal HCD ha Patrick Fischer nominà 6 giugaders, sper il capitani Andrès Ambühl èn quai ils defensurs Félicien Du Bois e Noah Schneeberger ed ils attatgaders Samuel Walser, Dino Wieser e Marc Wieser. Er da la partida è Nino Niederreiter. Il giugader da Cuira è sa decidì da giugar al campiunadi mundial suenter che la stagiun è ida a fin per Minnesota Wild en la NHL.

Felix Hollenstein, Patrick Fischer e Reto von Arx
Legenda: Il trio a la banda da la naziunala Svizra: (da san.) Felix Hollenstein, Patrick Fischer e Reto von Arx Keystone

Las diras nuschs a la fin

En la fasa da gruppa frunta la naziunala Svizra che vegn trenada dal trio Patrick Fischer ensemen cun Felix Hollenstein e Reto von Arx l'emprim sin il Kasachstan, lura sin la Norvegia, il Danemarc, la Lettonia ed a la fin suondan lura ils gronds calibers. L'emprim adversari dal top trio è la Russia, lu spetga la Svezia e sco dessert la Tschechia. L’emprim gieu encunter ils Kasachs è sonda, ils 7 da matg, a las 11:15 uras.

Canada retschaiva il buccal per il titel da campiun mundial da hockey 2015.
Legenda: Al davos campiunadi mundial il 2015 a Prag ed Ostrava ha il Canada triumfà. En il final han ils Canadais battì ils Russ cun 6:1. Keystone

Per la Russia dumbra sulet aur

La naziunala Svizra n’auda betg tranter ils top favurits al campiunadi mundial a Moscau e St. Petersburg. Ils gronds trumfs en la Russia ed il Canada, quellas duas naziuns ch’han giugà il final avant in onn. Durant ch’ils Canadais vulan defender il titel emprovan ils Russ da vegnir per la quarta gia campiuns mundials en l’agen pajais e per la 28avla gia insumma.