Siglir tar il cuntegn

Header

cuntegn

Naziunal/Internaziunal Midaments suenter campiunadi: Larry Huras sto bandunar Friburg

Suenter il campiunadi seguan ils midaments. Il pli prominent è probablamain, che Larry Huras sto bandunar Friburg Gotteron. En pli han David Jobin e Marc Reichert terminà lur carriera cun vegnir campiuns cun il SCB ed Ambri survegn cun Paolo Duca in nov schef da sport.

Suenter la fin dal campiunadi da hockey cumenza il temp da midaments. Uschia haja dat il glindesdi annunzias tar differents clubs:

Friburg Gotteron: Trenader Larry Huras sto bandunar il club

Larry Huras aveva surpiglià Friburg il settember passà da Gerd Zehnhäusern e manchentà ils playoffs ed uschia la mira avisada. Cun Huras banduna era il trenader-assistent Kari Martikainen il club. Quai ha il club communitgà il glindesdi suenter mezdi.

SC Berna: David Jobin e Marc Reichert termineschan lur carriera

Gia dapi il schaner eri cler ch’il club da Berna planiseschia la proxima stagiun senza il defensur Jobin (35) e l’attatgader Reichert (37). Uss han omadus terminà las carrieras.

David Jobin ha giugà 19 onns en seria per il SC Berna e gudagnà cun il club da la chapitala tschintg titels da campiun svizzer, uschè blers sco nagin auter.

Marc Reichert ha lantschà e terminà sia carriera a Berna, tranteren dentant anc giugà per Kloten ed Ambri. Tut en tut ha Reichert dà passa 1‘000 gieus en la liga naziunala A.

Ambri: Paolo Duca vegn nov schef da sport

Il HC Ambri-Piotta ha fatg in‘emprima midada da persunal en vista a la proxima stagiun da hockey sin glatsch. Il club da la Leventina ha engaschà Paolo Duca sco nov schef da sport.

L’anteriur capitani Paolo Duca daventa uschia successur d’Ivano Zanatta che banduna il club d’Ambri-Piotta. Paolo Duca veva terminà l’emna passada sia carriera suenter avair giugà 650 gieus en la liga naziunala A.

RR actualitad 17:05+

Artitgels legids il pli savens