Siglir tar il cuntegn
Inhalt

Naziunal/Internaziunal Medema professiun, differents umans

32 equipas e passa 700 giugaders èn da la partida als campiunadis mundials da ballape. Differenzas tranter ils giugaders datti bleras. In che croda en egl è il tranter auter il Svizzer Xherdan Shaqiri.

Legende: Audio Saira: Xherdan Shaqiri è in dals pitschens e dals stagns abspielen. Laufzeit 02:31 Minuten.
02:31 min, Actualitad dals 21.06.2018.

Il ballapeist svizzer Xherdan Shaqiri figurescha gist en pliras statisticas a la testa. Cun 1,65 meters è el numnadamain il pli pitschen giugader insumma a quest turnier. Mo Shaqiri è era in dals pli stagns cun in BMI da 28,65.

Danais ils pli grond e corpulents

Ils pli gronds e grevs giugaders ha en media il Danemarc. Blers èn fin 1,90 meters gronds e radund 80 kilos grevs. Ils Giapunais ed ils Peruans han perencunter ils pli levs e pitschens giugaders. Era tar la paisa datti gronda differenzas. Il defensur dal Panama, Roman Torres paisa bun 100 kilos, passa 40 kilos dapli che Takashi Inui dal Giapun.

Cun 27,2 onns ha la naziunala svizra en media in da las giuvnas equipas als campiunadis mundials. Bunas novas, pertge blers da quels giugaders pudessan uschia era esser als proxims gronds turniers da la partida. Las pli veglias equipas han tramess en Russia la Costa Rica ed il Panama.

La “grande nation” è la pli custaivla

L’equipa cun la pli gronda valur da martgà è la Frantscha cun 1,08 milliardas euros. En cumparegliaziun; il cader da la Svizra ha ina valur da radund 213 milliuns euros. Ed ils giugaders ils pli custaivels èn il Brasilian Neymar e l’Argentin Lionel Messi cun ina valur da martgà da bun 180 milliuns euros.

RR actualitad 17:00