Gia passa 8 onns èn passads dapi che Marc Gini (31) è stà sisum il podest. Sia victoria il 2007 en il slalom a Reiteralm en l’Austria è dentant er gist sia suletta victoria ed er il punct culminant da sia carriera. Dapi lura n’ha Marc Gini mai pli pudì far il pass sin il podest en ina cursa da la Cuppa mundiala.
Blessuras han franà Gini
Per il nunsuccess datti dentant er raschuns. Oravant tut sias grevas blessuras vid in schanugl han franà Marc Gini. Suenter la stagiun 2010/2011 è el vegnì operà gist duas giadas vid il meniscus. Ed il nunsuccess ha er gì consequenzas. Gini è be pli commember dal cader B da Swiss Ski.
Durant la stad passada ha Marc Gini per gronda part stuì trenar persuls. Gini ha er gì engaschà in trenader privat ch’el ha pajà ord l’atgna bursa. Perquai ha Gini er savens durmì en ina rulotta per uschia spargnar custs da hotel. Radund 15’000 francs ha el investì per trenaments e per in camp da trenament sin la naiv en la Nova Zelanda.
La via maina en la dretga direcziun
En questa stagiun è Marc Gini oravant tut sa participà a cursas da la Cuppa d’Europa per uschia gudagnar pli tgunsch puncts per la finala pudair ir a la partenza da la Cuppa mundiala cun in numer da partenza pli bass. Quella via è grategiada. Gini ha gudagnà la fin december e l’entschatta schaner gist dus slaloms da la Cuppa d’Europa. Il skiunz da Beiva è uschia puspè sin la dretga via enavos.
La finamira da Marc Gini en questa stagiun è da pudair sa participar al final da skis a San Murezzan cun ils megliers 25 skiunzs dal mund. E gugent fiss Gini er il 2017 a la partenza a San Murezzan, lura cura ch’i vegn cumbattì per medaglias al campiunadi mundial. La via è anc lunga, Marc Gini na dat dentant betg si. El è in skiunz che cumbatta senza fin, pertge il ir cun skis è e resta sia gronda passiun.
Sportissimo 17:00