Siglir tar il cuntegn
Inhalt

Naziunal/Internaziunal Luana Flütsch dat ses debut en la cuppa mundiala

Il venderdi parta la skiunza grischuna en la cumbinaziun alpina a Lai.

Per l’emprima giada en sia anc giuvna carriera dastga la skiunza Luana Flütsch ir a la partenza en la cuppa mundiala, quai anc davant ils fans da chasa. Il venderdi parta la skiunza da St. Antönien en la cumbinaziun alpina a Lai. Quai ha communitgà Swiss Ski.

Luana Flüsch ch’ha 23 onns n’è dentant betg la suletta skiunza grischuna che dastga ir la proxima fin d’emna a la partenza a las cursas da la cuppa mundiala a Lai. Vanessa Kasper da San Murezzan parta la sonda en il slalom gigant. La skiunza da 21 onns aveva gudagnà la fin december 2017 ses emprims puncts da la cuppa mundiala. A Lienz en l’Austria era Kasper vegnida 27avla en questa disciplina.

Sper las duas Grischunas ha Swiss Ski sa chapescha er nominà per questas cursas tecnicas ils gronds trumfs svizzers enturn Lara Gut, Wendy Holdener, Michelle Gisin u Denise Feierabend.

Sin il program stattan a Lai il venderdi, ils 26 da schaner, ina cumbinaziun alpina. La sonda vegn manà atras in slalom gigant e la dumengia in slalom.

RR actualitad 08:00