Siglir tar il cuntegn

Naziunal/Internaziunal Lewis Hamilton gudogna il Grond premi dal Canada

En la furmla 1 gudogna Lewis Hamilton sin Mercedes il Grond premi dal Canada a Montreal, quai avant il Tudestg Sebastain Vettel sin Ferrari. L’equipa da Ferrari perda pervi d’in sbagl tactic da l’equipa.

Lewis Hamilton.
Legenda: Lewis Hamilton gudogna gia per la 5. giada il Grond premi dal Canada. Keystone

Lewis Hamilton gudogna sia cursa preferida en il Canada gia per la tschintgavla giada. Per Hamilton è quai la segunda victoria en seria suenter la victoria al Grond premi da Monaco.

Il pilot da Ferrari Sebastian Vettel ha atgnamain fatg tut endretg a la cursa en il Canada. Cun in start explosiv ha il Tudestg vargà ils dus pilots da Mercedes Hamilton e Nico Rosberg. Hamilton ha alura prendì si la cursa cunter Vettel, Rosberg croda dentant enavos.

Bler memia baud a la box

La strategia da l’equipa da Ferrari n’era la finala betg la buna. Durant ina fasa dal «safty-car» han ils responsabels clamà Vettel a la box, la finala memia baud, perquai che Vettel ha suenter anc ina giada stuì vegnir en la box, da l’autra vart ha Hamilton sulet duvrà in stop da boxa. Davos Vettel vegn il pilot da Willams Vallteri Bottas sin la plazza trais. L’avantatg en il classament general da Rosberg sin ses collega d’equipa Hamilton munta uss 9 puncts.

Sauber senza schanza

Ils dus pilots da Sauber n'han gì nagina schanza. Marcus Ericsson arriva sin plazza 15 e Felipe Nasr sin posiziun 18.

RR novitads 06:00