Siglir tar il cuntegn
Inhalt

Naziunal/Internaziunal Lea Sprunger 5avla a Londra

Suenter ina partenza betg propi gartegiada, vegn la Svizra anc da prender suenter e cuntanscha plazza tschintg en la cursa sur 400 meters obstachels. Campiunessa mundiala daventa l'Americana Kori Carter.

L'atleta svizra Lea Sprunger
Legenda: Cun plazza tschintg è Lea Sprunger stada la segund-sperta atleta da l'Europa en il final dal campiunadi mundial. Keystone

La plazza tschintg da Lea Sprunger è il meglier resultat svizzer al campiunadi mundial d'atletica leva a Londra fin uss. Cun ses temp da 54,59 secundas manchenta ella bronz per var otg dieschavels.

Victura ed uschia campiunessa mundiala sur 400 meters obstachels daventa l'Americana Kori Carter, avant sia cumpatriota Dalilah Muhammad. La medaglia da bronz va a Ristananna Tracey da la Giamaica.

L'atleta svizra Mujinga Kambundji
Legenda: Mujinga Kambundji durant sia cursa dals 200 meters en ils mezfinals da Londra. Keystone

Naginas Svizras en il final dals 200 meters

Ni Sarah Atcho ni Mujinga Kambundji èn stadas avunda spertas en lur cursas dal mezfinal per vegnir en il final. Bain è Kambundji sa rangada sco terza cun 23,00 secundas, dentant n'ha ses temp betg tanschì per sa qualifitgar. Atcho è daventada 6avla en sia cursa cun in temp da 23,12 secundas, 0,22 secundas sur ses record persunal.

Selina Büchel vinavant

En la pli sperta cursa d'eliminaziun sur ils 800 meters al campiunadi mundial, vegn Selina Büchel sin plazza trais. Quai munta la qualificaziun directa per ils mezfinals per la Svizra da 26 onns. Büchel è stada bunamain l'entira cursa tranter las emprimas. E la finala ha ella mo pers 37 tschientavels sin la victura da sia cursa d'eliminiaziun, Francine Niyonsaba dal Burundi.

La Svizra Selina Büchel tranter autras curriduras
Legenda: Selina Büchel defenda en il spurt da la cursa d'eliminaziun a Londra ses terz plaz. Keystone

Ils mezfinals sur 800 meters al campiunadi mundial a Londra han lieu il venderdi, il final è la dumengia. Da pudair cuntanscher lez resta la finamira da Selina Büchel.

RR novitads 22:00