Siglir tar il cuntegn

Naziunal/Internaziunal Laurien van der Graaff triumfescha a Lai

La passlunghista grischuna gudogna cun il sprint al Tour de Ski per l’emprima giada ina cursa da la coppa mundiala. Van der Graaff procura uschia per ina partenza da siemi per la terza ediziun dal Tour de ski a Lai.

Uschia po festivar Laurien van der Graaff ses – enfin uss – pli grond success quasi avant sia porta chasa: L’atleta da Tavau gudogna cun ina prestaziun suverana l’emprima cursa dal Tur de ski 2017/2018. Secunda vegn l'Americana Sophie Caldwell, terza la campiunessa mundiala da la Norvegia, Maiken Caspersen Falla.

Van der Graaff era sa qualifitgada sco suletta Svizra cun tschintg autras curriduras per il final dal sprint da skating. Suenter ina buna partenza e la qualificaziun per il quartfinal èn Nadine Fähndrich, Nathalie von Siebenthal e la biatleta Selina Gasparin betg pli vegnidas vinavant.

Umens svizzers betg cun tant success

En in foto-finish cun ses collega d’equipa Roman Schaad ha manchentà Dario Cologna la qualificaziun en il mezfinal. Il Grischun finescha l’emprim di dal Tour de ski cun 10 secundas da bonus e la 14avla plazza en il sprint. Meglier Svizzer è stà Jovian Hediger sin plazza otg, trais plazzas avant Roman Schaad.

Sergey Ustiugov ha defendì ses titel dal Tour de ski da l’onn passà. Il Russ ha gudagnà avant il Taglian Federico Pellegrino ed il Franzos Lucas Chanavat e survegn uschia 60 secunda da bonus sin il classament total.

RR novitads 12:00++

Program dal Tour de ski a Lai

Sonda, 30-01

  • 10:30 qualificaziun sprint en stil liber (umens e dunnas)
  • 13:00 final sprint en stil liber (umens e dunnas)

Dumengia 31-01

  • 10:30 partenza singula umens – 15 km en stil classic
  • 15:00 partenza singula dunnas – 10 km en stil classic

Glindesdi 01-01

  • 11:00 persecuziun dunnas – 10 km en stil liber
  • 13:00 persecuziun umens – 15 km en stil liber