Siglir tar il cuntegn
cuntegn

Naziunal/Internaziunal Lara Gut parta sco ina da las top favuritas

Cun il super-G da las dunnas vegn il campiunadi mundial da ski alpin lantschà a Vail/Beaver Creek. Per la Svizra partan 3 skiunzas cun differentas ambiziuns. Il grond trumf svizzer è senza dubi Lara Gut.

La skiunza Lara Gut cun egliers da sulegl gronds e chapitscha da Swissski.
Legenda: Lara Gut vala sco ina da las grondas favuritas per il titel da campiunessa mundiala en il super-G. Reuters

La Tessinaisa ha festivà 7 da sias 11 victorias en la cuppa mundiala en quella disciplina, plinavant ha Gut gudagnà la stagiun passada la rucla da cristal en la disciplina super-G.

Schanzas sin ina medaglia ha er Fabienne Suter ch'è gia vegnida ina giada segunda en il super-G da Beaver Creek e che sa senta bain sin la naiv nordamericana.

La terza svizra, Priska Nufer, è per l'emprima giada insumma ad in eveniment grond. Ella n'ha da perder nagut en sia emprima cursa e po ir a la partenza senza grond squitsch. Nufer parta cun il numer 5, Suter cun il numer 7 e Gut cun il numer 16.

Vonn, Fenninger, Maze...

Tar las grondas favuritas audan sper Lara Gut segira franc la matadora locala Lindsey Vonn, l'austriaca Anna Fenninger sco er Tina Weihrather dal Principadi dal Liechtenstein.