Siglir tar il cuntegn
cuntegn

Naziunal/Internaziunal Lara Gut manchenta be per pauc la victoria e vegn segunda

Federica Brignone ha gudagnà il segund davos super G avant ils gieus olimpics d'enviern. La skiunza Taliana è stada 0,18 secundas pli sperta che Lara Gut a Bad Kleinkirchheim. Terza è l'Austriaca Cornelia Hütter.

Lara Gut è ida ina lingia ideala. Durant la cursa ha ella pudì augmentà ses avantatg. Curt avant l'arrivada è Gut ida fitg stretg sper ina porta ora ed ha pers ses fist da skis. Anc tar il davos temp intermediar manava Gut per 0,08 secundas avant la posteriura victura Brignone.

Il podest

  • 1. Federica Brignone (Italia) 1:09,80
  • 2. Lara Gut (Svizra) +0,18
  • 3. Cornelia Hütter (Austria) +0,46

Las ulteriuras Svizras

  • 14. Michelle Gisin
  • 16. Joana Hählen
  • 19. Corinne Suter
  • 22. Jasmine Flury
  • 28. Priska Nufer
  • Rahel Kopp è crudada ora.

Hählen ha gì in fitg bun start, lura dentant pers temp suenter in sbagl. Era Michelle Gisin ha entschet bain la cursa, all'entschatta era ella schizunt avant la manadra. Lura ha Gisin prendì ora memia bler tempo ed è crudada enavos.

Temperaturas autas

Las temperaturas autas ed ina pista memia loma han fatg in stritg tras il quint dals organisaturs da la cursa rapida a Bad Kleinkirchheim. La cursa ha stuì vegnir interrutta, perquai ch'ins ha anc stuì preparar la pista.

Plinavant han las dunnas be pudì trenar sin il tschancun sura da la cursa rapida. Suenter il super G da la sonda era planisà da trenar sin il tschancun da la cursa rapida sut. Quest trenament è anc ina giada vegnì spustà. Da nov treneschan las dunnas la dumengia avant la cursa sin il tschancun sut.

RR novitads 14:00

Program a Bad Kleinkircheim

Il super G da la dumengia han ils organisatur tratg enavant sin la sonda. La cursa rapida è planisada per la dumengia a las 11:15.