Siglir tar il cuntegn

Header

Navigaziun

cuntegn

Naziunal/Internaziunal Lara Gut gudogna cursa rapida a Cortina d’Ampezzo

Per ina giad ha Gut gì il cletg dals tschientavels da sia vart. La skiunza tessinaisa gudogna la cursa rapida a Cortina d’Ampezzo en l’Italia 5 tschientavels avant la Taliana Sofia Goggia e 47 tschientavels avant la Slovena Ilka Stuhec ch’ha gia gudagnà trais cursas rapidas en questa stagiun.

Lara Gut gudogna si'emprima cursa rapida en questa stagiun, e la davosa avant ils campiunadis mundials a San Murezzan. Per Lara Gut èsi gia la 5avla victoria en questa stagiun suenter ver gudagnà l’emprim slalom gigant a Sölden ed ils trais super-g’s a Lake Louise, Val d’Isère ed a Garmisch-Partenkirchen.

Gut en direcziun rucla gronda da cristal

En tut èsi gia la 23avla giada che Lara Gut stat sisum il podest d’ina cursa da la cuppa mundiala. Grazia a questa victoria è la skiunza da 25 onns er vegnida fitg datiers a l’Americana Mikaela Shiffrin en il cumbat per la rucla gronda da cristal. Gut ha be pli 30 puncts pli pauc sin il conto che Shiffrin.

Betg pudì persvader a Cortina d’Ampezzo han las ulteriuras skiunzas svizras. Fabienne Suter ha pers bun ina secunda e mesa ed è vegnida 19avla, communablamain cun l’Austriaca Anna Veith. Denise Feierabend è vegnida 23avla, Michelle Gisin 24avla e Corinne Suter 25avla. Crudada ora è – sco gia ier en il trenament – l’Americana Lindsey Vonn.

Damaun è a Cortina d’Ampezzo sin la pista dals campiunadis mundials il 2021 in super-G da las dunnas.

RR novitads 12:00