Siglir tar il cuntegn

Header

cuntegn

Lahti 2017 Ustjugow campiun mundial dal skiatlon a Lahti

Il Russ Sergej Ustjugow ha gudagnà ses emprim titel da campiun mundial. Il victur dal Tour de ski ha gudagnà avant il Norvegiais Martin Johnsrud Sundby.

Ils dus top-favurits Sergej Ustjugow (Ru) e Martin Johnsrud Sundby (No) han fatg giu il skiatlon (2 x 15 km) tranter els. Radund 10 kilometers avant l'arrivada èni omadus sa distanziads da la concurrenza.

audio
Saira: Ustjugow curra per l'emprim titel da campiun mundial
ord Actualitad dals 25.02.2017.
laschar ir. Durada: 56 Secundas.

Durant ina prova da distanziar Sergej Ustjugow è però in fist da Sundby rutt tar l'ultima ascensiun ed è ruclà, uschia che ses emprim aur singul è restà in siemi.

Il sprint per bronz ha gudagnà il norvegiais Finn Haagen Krogh.

Baumann e Rüesch sin plazs 13 e 25

Il Grischun Jonas Baumann da Lon sin la Muntogna da Schons è vegnì 13avel. Baumann ha pers bun 40 secundas sin il victur Ustjugov e mo bun 10 secundas sin il terz Krogh.

Il segund Grischun, Jason Rüesch da Tavau, è daventà 25avel tar sia premiera ad in campiunadi mundial. Quai cun in retard da bun 3 minutas e mez sin il campiun mundial Sergej Ustiugov.

Skiatlon senza Dario Cologna

Dario Cologna n'è betg partì pervi da problems cun in ventrigl. Atgnamain è il skiatlon la disciplina da parada da Dario Cologna, nua ch’el è gia stà campiun olimpic e campiun mundial.

RR actualitad 15:00

Artitgels legids il pli savens