Il quartet norvegiais è i en la cursa da la staffetta da dunnas sco grond favurit ed ha lura era gudagnà a moda suverana la medaglia dad aur. Las Norvegiaisas èn stadas bun ina minuta pli spertas che las Svedaisas, che han gudagnà la medaglia d’argient. Bronz gudognan las Finlandaisas. Per la Norvegia èsi gia la 100avla medaglia d’aur a champiunadis mundials.
Sa legrar dastga è la staffetta svizra: Il quartett cun Laurien van der Graaff, Nadine Fähndrich, Nathalie von Siebenthal e Seraina Boner è vegnì setavel.
Emprima staffetta dapi 10 onns
Per l’emprima giada suenter Sapporo l’onn 2007 èn las dunnas svizras puspè stadas da la partida en la staffetta. Ils ultims onns n'aveva la Svizra betg gì avunda passlunghistas ch’eran ablas da cumbatter sin il pli aut livel internaziunal. Cun la nova generaziun enturn Nathalie von Siebenthal, Laurien van der Graaff e Nadine Fähndrich è quai sa midà.
Il team è vegnì cumplettà da Seraina Boner da Claustra. Sco unica era ella gia il 2007 a Sapporo da la partida.
RR novitads 15:00 / actualitad 17:30