Campiun mundial è il medem sco gia sin la schanza pitschna. L’Austriac Stefan Kraft ha gudagnà aur avant il tudestg Andreas Wellinger ed il Polac Piotr Zyla. La decisiun tranter aur, argient e bronz è stada piz a cup. Decidì han la finala las meglras notas stilisticas per Stefan Kraft.
Simon Ammann mussa bunas prestaziuns
Il Svizzer ha mussà ina da las meglras prestaziuns da la stagiun ed è vegnì 14avel. Duas giadas ha Simon Ammann mussà buns segls e l’emprima giada è el schizunt sa tschentà bain cun in telemarc ed ha survegnì bunas notas persuenter. Suenter ses segund sigl sin la schanza gronda ha il quadrupel campiun olimpic annunzià ch’el cuntinuescha sia carriera cun la finamira da parter l’enviern che vegn als gieus olimpics da Pyeongchang, i fissan ses sisavels gieus olimpics.