Siglir tar il cuntegn
Inhalt

Lahti 2017 Ammann senza ambiziuns da medaglia

Simon Ammann è in dals gronds en ses sport, dentant betg en quella stagiun. Als campiunadis mundials a Lahti parta Simon Ammann cun tut autras ambiziuns che da gudagnar ina medaglia, pertge gliez fiss ina sensaziun.

Simon Ammann.
Legenda: Simon Ammann è in dals gronds en ses sport, dentant betg en quella stagiun. Keystone

Sia gronda finamira è da cuntanscher il meglier resultat da la stagiun, pia in plaz en ils top 10, quai ch’è anc mai reussì al sportist dal Toggenburg. Ses 11avel plaz d’avant duas emnas a Sapporo en il Giapun è il meglier resultat fin ussa.

La rutina sco plus

Ina rolla centrala pudess era il vent giugar a Lahti. En il nord da Helsinki buffa il vent bain savens, uschia che la rutina pudess er esser in punct decisiv, quai che Simon Ammann ha sco betg in auter.

Plinavant dovra Ammann dentant era in zic il cletg cun ils puncts. Survegn el sco bain savens notas bassas dals arbiters è il cumbat per las medaglias pers.

Gudagnà gia tut

Quatter giadas campiun olimpic, campiun mundial, victur da la cuppa mundiala. Simon Ammann ha gudagnà tut quai ch’ins po gudagnar en siglir cun skis, cun excepziun da la turnea da quatter schanzas nua ch’el è daventà duas giadas segund.

RR actualitad 07:00