Siglir tar il cuntegn

Header

Navigaziun

Podladtchikov en la mesa pipa a Laax.
Legenda: Iouri Podladtchikov en la mesa pipa a Laax. Keystone
cuntegn

Naziunal/Internaziunal Laax Open: Iouri Podladtchikov vegn terz

Era en la segunda cursa dal cup mundial en la mesa-pipa da quest enviern è cun Podladtchikov in svizzer sin il podest.

Era en la segunda cursa dal cup mundial en la mesa-pipa da quest enviern è cun Iouri Podladtchikov in svizzer sin il podest. En la cursa da Copper Mountain era el vegnì segund suenter ses cumpatriot Pat Burgener.

Gia avant il terz ed ultim percurs final dal campiun olimpic Podladtchikov era cler, ch’il svizzer terminescha la cursa dal cup mundial a Laax sin il podest.

Cun ses percurs pli gartegià ( cun in « Double Alley oop Chuck Flip» sco tric final ordvart difficil) ha el stgatschà ses collega da team Jan Scherrer sin plaz quatter. A Pat Burgener, victur da la prima cursa da la stagiun, è gartegià mo in percurs schuber. El vegn perquai mo sin plaz otg.

El aut sin en il blau, sut la pipa.
Legenda: El è sgulà davent a tuts - Chase Josey (21) dals Stadis Unids. Keystone

Dals Stadis Unids, cun sis da 12 curridurs en il final la naziun pli ferma, vegn er il victur. Chase Josey (21), anc in num betg enconuschent, n’aveva anc mai participà ad ina cursa ordaifer l’America. Cun in terz percurs fenomenal (97,75 puncts) ha el gudagnà avant l’Australian Scotty James.

Ariella Gold (USA), Chloe Kim (USA) e Cai Xuetong (CN).
Legenda: Il podest da las dunnas - Ariella Gold (USA), Chloe Kim (USA) e Cai Xuetong (CN). Keystone

Tar las dunnas ha gudagnà l’Americana Chloe Kim (16). Ella ha realisà il setavel success en ina seria, che dura gia dapli ch’in onn. L’ultima giada, ch’ella n’era betg sin il podest, è stà il schaner 2016 en ils Stadis Unids. Segunda à vegnida sia cumpatriota Arielle Gold e terza la chinaisa Cai Xuetong.

Ella en il blau.
Legenda: Ella dominescha las cursas da las dunnas - l'Americana Chloe Kim (16) sur la mesa-pipa da Laax. Keystone

RR Sportissimo 17:05