Siglir tar il cuntegn

Header

cuntegn

Naziunal/Internaziunal La Svizra vul batter il campiun d’Europa

Uss vegni serius. Per la naziunala svizra da ballape cumenza questa saira la missiun qualificaziun per il campiunadi mundial da ballape il 2018 en Russia. Gist en l’emprim gieu da qualificaziun frunta l’equipa da Vladimir Petkovic sin in dals gronds dal ballape, il nov campiun d’Europa il Portugal.

Suenter la terrada en l’otgavelfinal da l’EURO en Frantscha, nua ch’ils Svizzers han pers encunter la Pologna suenter sajettar penaltis, cumenza uss in nov capitel. La Svizra vul er esser da la partida al proxim grond turnier en dus onns en Russia. Suenter il titel da campiun d’Europa vala il Portugal sco il favurit en la gruppa dals Svizzers. Vul la naziunala svizra sa qualifitgar sco victurs da gruppa direct per il proxim grond turnier sto ella bunamain gudagnar puncts en l’emprim cunter ils Portugais.

Paucas midadas

En cumparegliaziun cun il campiunadi d’Europa ha il trenader naziunal Vladimir Petkovic fatg tants sco naginas midadas en ses cader. Quai munta che Haris Seferovic pudess salvar ses plaz en l’attatga ed ad Eren Derdiyok resta sulet la rolla da reserva. Plinavant vegn er speculà che Admir Mehmedi pudess giugar a partir da l’entschatta.

Ils stars mancan

Remplazzar sto Vladimir Petkovic perencunter Xherdan Shaqiri. Il topscorer dals svizzers manchenta il gieu cunter il Portugal pervia d’ina blessura. Suenter ils trenaments dals davos dis pleda bler che Breel Embolo vegn a remplazzar Shaqiri. Plinavant manchentan er Luca Zuffi e Shani Tarashaj il gieu da questa saira. Zuffi ha stendì ils lioms dal pe e Tarashaj patescha d’angina.

Il Portugal n’exista betg sulet ord Cristiano Ronaldo, quai han ins vesì a l’EURO en Frantscha.
Autur: Fabian Schär defensur naziunala svizra

Er betg da la partida è il superstar dal Portugal, Cristiano Ronaldo. Er il giugader da Real Madrid è blessà. Ils Portugais han dentant gia mussà a l’EURO ch’els èn buns da batter mintgin, er senza Ronaldo. En il final cunter la Frantscha veva Cristiano Ronaldo stuì bandunar gia baud la plazza pervia d’ina blessura, e tuttina ha l’equipa da Fernando Manuel Costa Santos la finala triumfà.

Ils ulteriurs adversaris da la naziunala Svizra en la campagna da qualificaziun per il campiunadi mundial dal 2018 en l’Ungaria, la Lettonia, l’Andorra e las Inslas Feroe.

audio
Mezdi: Prevista ballape Svizra-Portugal
ord Actualitad dals 06.09.2016.
laschar ir. Durada: 3 minutas 27 Secundas.

LIVE al Radio Rumantsch

Il Radio Rumantsch rapporta live dal gieu da qualificaziun tranter la Svizra ed il Portugal, quai a partir da las 20:00 uras. Il gieu cumenza las 20:45 uras en il St. Jakob-Park a Basilea.

Artitgels legids il pli savens