Siglir tar il cuntegn

Naziunal/Internaziunal La Svizra è en il final dal campiunadi mundial

L’equipa naziunala ha battì il Canada en il mezfinal cun 3:2 e gioga la dumengia cunter la Svezia per il titel.

Ina equipa da hockey che sa brancla.
Legenda: L’equipa svizra festivescha lur victoria en il mezfinal cunter il Canada. Keystone
  • La Svizra ha gudagnà cunter il Canada cun 3:2 e stat en il final dal campiunadi mundial en il Danemarc.
  • Dus gols da powerplay han splanà la via per la surpraisa.
  • Sco il 2013 frunta la Svizra en il final sin la Svezia.

En il mezfinal han ils Svizzers mussà ina partida grondiusa. Il goli Leonardo Genoni ha, cun sia fitg buna prestaziun, contribuì a moda decisiva a l’exploit da l’equipa svizra.

Scherwey, Hofmann e Haas

Curt avant la fin da l’emprim terz ha Tristan Scherwey fatg l’emprim gol per la Svizra. Suenter che Bo Horvat aveva egualisà la partida per ils Canadais en la 28avla minuta ha la Svizra reagì be dus minutas pli tard cun il gol da Gregory Hofmann en ina situaziun da powerplay. Era il terz gol è vegnì fatg en in powerplay - e quai da Gaëtan Haas en la 45avla minuta.

Final sco il 2013

Sco il 2013 a Stockholm frunta la Svizra en il final puspè sin la Svezia. Quella giada aveva la Svezia gudagnà cun 5:1 cunter la Svizra. Dapi lura han ils Svizzers pers tut las partidas cunter ils Scandinavs. Ils Svedais han fin uss mussà ina prestaziun excellenta als campiunadis mundials e gudagnà mintga partida. En il mezfinal han els battì ils Stadis Unids cun 6:0. Dentant è er la squadra Svizra sa mussada da la meglra vart e las schanzas da gudagnar aur restan.

RR novitads 22:00