L’enviern passà èn gist plirs favurits sa blessads ed han uschia stuì terminar la stagiun pli baud che giavischà, tranter auter il dominatur dals davos onns, il Norvegiais Aksel Svindal ch’era cupitgà grevamain il schaner sin la Streif a Kitzbühel.
Er puspè enavos è il campiun olimpic da Sotschi, l’Austriac Matthias Mayer ch’era cupitgà grevamain en la cursa da Val Gardena curt avant Nadal.
Ord l’equipa austriaca turnan enavos en il circus da skis er Georg Streitberger e Max Franz. In ulteriur prominent ch’è a Val d’Isère puspè a la partenza è er il Franzos Guillermo Fayed ch’ha rut la fin da la davosa stagiun il liom cruschà.
Trio svizzer enavos a la partenza
Er ord il cader da Swiss Ski turnan gist trais skiunzs enavos en il circus da skis. Ina gia ils dus Grischuns Sandro Viletta e Mauro Caviezel sco era il Glarunais Patrick Küng.
Il pli grond discletg cun blessuras ha Mauro Caviezel gì ils davos onns. Anc avant che la davosa stagiun aveva cumenzà ha Caviezel rut in oss dal ventrigl, l’avrigl è lura vegnida vitiers in greva blessura vid in schanugl e la stad ha ina blessura vid in maun sfurzà Caviezel da far ina pli lunga pausa. A Val d’Isère va el perquai l’emprima giada a la partenza d’ina cursa da la cuppa mundiala dapi 20 mais. Stuì terminar la davosa stagiun gia l’entschatta schaner, pia avant ils gronds classichers da Wengen e Kitzbühel, avevan il campiun olimpic da Sotschi, Sandro Viletta, ed il campiun mundial da Vail/Beaver Creek, Patrick Küng. Omadus han gì blessuras vid in schanugl.
Sper il trio Küng, Viletta e Caviezel partan a Val d’Isère er Carlo Janka, Beat Feuz, Fernando Schmed, Thomas Tumler, Marc Gisin, Nils Mani, Ralph Weber, Niels Hintermann e Stefan Rogentin.
RR actualitad 17:00