Siglir tar il cuntegn
Inhalt

Naziunal/Internaziunal La naziunala da ballape Svizra cun in pensum schliabel

Il pli ferm adversari da la Svizra per sa qualifitgar per il campiunadi mundial da ballape 2018 en Russia è probabel il Portugal. Sonda saira è vegnì tratg la sort a St. Petersburg. Dasper il Portugal spetgan l'Ungaria, la Lettonia, l'Andorra ed ils Feroais sin l'equipa naziunala Svizra.

in visur mussa la gruppa A e B da la qualificaziun per il campiunadi mundial da ballape 2018 en la Russia
Legenda: Las gruppas da qualificaziun per il CM da ballape 2018 en la Russia Reuters
En ina cuppa èn cullas cotschnas che cuntegnan nums da pajais che vulan sa qualifitgar per il campiunadi mundial da ballape 2018 en Russia
Legenda: Las culas cun ils pajais che vulan sa qualifitgar per il CM en Russia Reuters

Las partidas da qualificaziun èn tranter il settember 2016 e l'october 2017. Il davos gieu che la Svizra ha dà cunter il Portugal è stà il 2008 al campiunadi europeic. Là aveva la Svizra gudagnà cun 2:0. Cunter l'Ungaria ha la Svizra betg giugà ils ultims 13 onns. Il 2002 aveva la Svizra gudagnà cun 2:1 in gieu d'amicizia. L'Andorra è anc mai stada l'adversari da l'equipa Svizra e cunter ils Feroais ha la Svizra gudagnà tut ils quatter inscunters.