Per il punct culminant da l’onn ha il trenader naziunal Sascha Brendler nominà 20 giugadras, da quellas èn 8 giugadras da Piranha Cuira. Quai èn Seraina Ulber, Ladina Sgier, Sonja Putzi, Flurina Marti, Ramona Ludwig, Manuela Dominioni, Priska von Rickenbach e Katrin Zwinggi.
En la fasa da gruppa frunta la Svizra sin la Pologna, la Finlanda e la Norvegia. En l’autra gruppa figureschan la Svezia, la Tschechia, la Slovachia e la Lettonia.
Cun power da Piranha a Tampere
Che bunamain la mesadad da la naziunala svizra èn giugadras da Piranha Cuira n’è nagina surpraisa. Il club grischun ha dominà ils davos onns la scena dad unihockey da las dunnas en Svizra. Ils davos 6 onns ha Piranha gudagnà 5 giadas il titel da campiun svizzer, il davos 4 giadas en seria. Piranha Cuira è actualmain propi il numer 1 quai che pertutga il sport d’unihockey en Svizra.