Kerber daventa il nov numer 1

La giugadra da tennis Angelique Kerber è a partir da glindesdi il nov numer 1 dal mund. La Tudestga stauscha suenter 186 emnas l’Americana Serena Williams giu dal tron.

Angelique Kerber.

Legenda da maletgs: Angelique Kerber è suenter Steffi Graf la segunda Tudestga che daventa il numer 1 dal tennis. Keystone

Al grand slam da tennis, il US Open a New York, ha Serena Williams pers ses gieu da mezfinal cunter Karolina Pliskova da la Tschechia en dus sets cun 2:6 e 6:7 (5:7). Angelique Kerber da l’auter maun ha gudagnà il mezfinal cunter Caroline Wozniacki dal Danemarc senza problems en dus sets cun 6:4 e 6:3. Kerber cuntanscha uschia per la terza gia quest onn in final d’in grand slam.

Angelique Kerber è il 22avel numer 1 sin il tour da las dunnas e la segunda Tudestga suenter Steffi Graf.

Hingis/Vandeweghe perdan

A fin è l’US Open per il duo Martina Hingis e Coco Vandeweghe. La Svizra e l’Americana han pers il gieu da mezfinal cunter las Franzosas Caroline Garcia e Kristina Mladenovic en dus sets cun 3:6 e 4:6. En il final dal turnier da dubel fruntan las Franzosas sin l’Americana Bethanie Mattek-Sands e la Tscheca Lucie Safarova.

RR novitads 06:00