Siglir tar il cuntegn
Inhalt

Naziunal/Internaziunal Joshua batta K.O. Klitschko

L'Englais giuven da 27 onns ha gudagnà avant 90'000 aspectaturs en il stadion da Wembley a Londra. Quai cunter Wladimir Klitschko ch'è cun ses 41 onns gia dapi blers onns en la fatschenta ed è er gia stà campiun mundial. En l'11avla runda è Klitschko ì K.O. e Joshua ha uschia gudagnà.

Purtret da Joshua e Klitschko.
Legenda: Igl è stà in dir cumbat per omadus, dentant perda Klitschko il davos il cumbat. Reuters

Suenter 2 minutas e 25 secundas ha l'arbiter rut giu il cumbat en 11avla runda, suenter che Joshua ha tutgà duas giadas ferm Klitschko e quel ha respundì cun ina seria. Enfin che l'arbiter ha rut giu il cumbat è il cumbat stà da fitg aut nivel.

I saja stà in dals megliers cumbats per il titel da campiun mundial da quest decenni. Il duel avess mintga mument er pudì cupitgar sin la vart da Klitschko. Suenter 10 rundas han dus dals derschaders da puncts gì Joschua davant cun 96:93 puncts e 95:93 puncts. Tar il terz è Klitschko stà davant cun 95:93 puncts.

Omadus boxists èn stads al plantschieu avant l'11avla runda. Klitschko en la tschintgavla e Joshua en la sisavla runda. L'emprima giada ha Joshua stuì cumbatter pli ditg che la setavla runda per gudagnar in cumbat. En tut è quai stà ses 19avel cumbat da profis. Medemamain è el l'emprima giada durant sia carriera da profi ì a terra.

RR novitads 12:00