Il pli spert sin la pista «Birds of Prey» è stà il Norvegiais Kjetil Jansrud. Sin Jansrud ha Janka pers 25 tschientavels. Sin plaz trais è classà il Tudestg Josef Ferstl.
Küng anc betg sin turas
Patrick Küng è turnà enavos a Beaver Creek cun bunas regurdientschas. Sin la «Birds of Prey» er’il skiunz glarunais daventà la stagiun passada campiun mundial en la cursas rapida. Tar ses emprim trenament per la proxima cursa ha Küng dentant pers 1,7 secundas sin Kjetil Jansrud ed è classà be sin plaz 20.
Tut ils ulteriurs svizzers n’han betg cuntanschì in plaz sut ils top 30. Thomas Tumler è vegnì 36avel, Marc Gisin 40avel, Sandro Viletta 42avel, Fernando Schmed 53avel, Nils Mani 59avel, Amaury Genoud 68avel e Gino Caviezel 70avel.
Gut pronta per Lake Louise
Lara Gut ha persvadì en l’emprim trenament per la cursa rapida a Lake Louise en il Canada. La Tessinaisa è vegnida terza. Sin la pli sperta, l’Austriaca Cornelia Hütter, ha Gut pers 97 tschientavels.
Enfin ussa è Lara Gut, tar 11 cursas rapidas dapi il 2008, anc mai stada classada meglier che sin plaz 8 a Lake Louise. Il terz plaz en il trenament e la victoria en il slalom gigant ad Aspen pudessan ussa dar ulteriura motivaziun.
Cun Fabienne Suter sco 16avla, Mirena Küng 17avla e Joana Hählen 20avla han anc trais ulteriuras skiunzas svizras cuntanschì in plaz en ils top 20.
Vonn cun problems
La gronda favurita Lindsey Vonn ha pers en il trenament passa 4 secundas sin Cornelia Hütter. L’Americana, ch’ha gia triumfà 15 giadas a Lake Louise, ha dentant fatg in grond sbagl è vegnida dal tuttafatg davent da la lingia ideala.
RR novitads 23.00