Naziunal/Internaziunal - Ivanovic chala cun il tennis
L'anteriur numer in dal tennis da las dunnas, Ana Ivanovic sa retira. La Serba da 29 onns ha annunzià questa decisiun via in video sin facebook. I na saja betg stà ina simpla decisiun. Ella na possia dentant betg pli cuntanscher ses meglier nivel, uschia ha ditg Ivanovic.
Suenter pliras blessuras ha ella terminà la stagiun il settember sco numer 65 dal mund. - Il pli grond success ha Ivanovic festivà il 2008 cun la victoria al French Open. En sia carriera ha ella gudagnà 15 turniers da WTA.
La dunna dal ballapedist Bastian Schweinsteiger vul esser davent dad immediat ambassadura per sport e vita sanadaivla, s'engaschar per l'ovra d'uffants UNICEF, uschia ha fatg a savair Ivanovic.
