Siglir tar il cuntegn
Inhalt

Naziunal/Internaziunal Innerhofer e Reichelt danovamain ils sperts

Er il segund trenament per la cursa rapida a Santa Caterina en la Valtellina han dominà il Talian Christof Innerhofer e l’Austriac Hannes Reichelt. Innerhofer è stà 24 tschientavels pli spert che Reichelt. Omadus avevan gia dominà suveran l’emprim trenament.

Christof Innerhofer
Legenda: Christof Innerhofer vala sco in dals gronds favurits a Santa Caterina. Keystone

Terz dal segund trenament è vegnì il Franzos Adrien Theaux cun in retard d’ina mesa secunda. Ils dus dominaturs da la stagiun, il Norvegiais Kjetil Jansrud ed Aksel Svindal, n’han anc betg chattà il dretg recept a Santa Caterina. Jansrud ha pers 1,58 secundas ed è vegnì 8avel, Svindal ha schizunt pers 2,65 secundas ed ha stuì sa cuntentar cun il 19avel plaz.

Svizzers lunsch davent dals megliers

Insumma betg sin turas a Santa Caterina vegnan ils skiunzs da Swiss Ski. Meglier svizzer è stà sco gia egl emprim trenament Carlo Janka. Il skiunz da Sursaissa ha pers bun trais secundas ed è vegnì 22avel. El n’ha cunquai betg pudì sa megliurar en cumparegliaziun cun l’emprim trenament. Là era Janka vegnì 20avel.

Cun Fernando Schmed sco 29avel cun in retard da 3,48 secundas è anc in segund svizzer classà sut ils megliers 30. Tut ils auters skiunzs svizzers han pers tranter 4 e 6 secundas.

RR novitads 14.00