Siglir tar il cuntegn
cuntegn

Naziunal/Internaziunal Indian Wells – Federer resta numer 1

Roger Federer cuntanscha al turnier dad Indian Wells il mezfinal. El gudogna il quart final cunter il Sidcorean Chung Heyon en dus sets cun 7:5 e 6:1. Quai rapporta srf.ch.

Federer gioga tennis.
Legenda: Roger Federer resta il numer 1. Keystone

Cun questa victoria resta Roger Federer il numer 1. Il Svizzer (36) egualisescha cun la 16avla victoria en seria il 2018 ses agen record da l’onn 2006.

Cunter Chung haja Federer confermà ina giada dapli, ch’el sappia ir enturn fitg bain cun squitsch, rapporta srf.ch. Al cumenzament dal segund set ha el sa dustà cunter quatter schanzas da break dal sidcorean ed ha savì realisar uschia il break al 2:0.

En il mezfinal frunta Federer la sonda saira ad Indian Wells en California sin il croat Borna Coric (ATP 46). Il giugader croat aveva gudagnà en 3 sets cunter il Sidafrican Kevin Anderson.

RR novitads 06:00