Siglir tar il cuntegn
cuntegn

Naziunal/Internaziunal Ils ZSC Lions èn campiuns

La setavla e davosa partida dal final dals playoffs decidan ils da Turitg en lur favur. En la Resega gudognan ils ZSC Lions cun 2:0 cunter il HC Lugano, e la seria cun 4:3. Cunquai daventan ils ZSC Lions per la novavla giada campiun svizzer.

Legenda: Tadlar il audio Bunura: Ils ZSC Lions èn campiuns. Durada 03:12 minutas.
03:12 min, Actualitad dals 28.04.2018.

Il gol da la saira sajetta il chapitani dals Lions, Patrick Geering, gia suenter set minutas. La pli gronda schanza per Lugano, da Maxim Lapierre en la 56avla minuta, impedescha il goli turitgais Lukas Flüeler cun ina parada miraculusa. Ronalds Kenins gartegia 19,4 secundas avant la fin al 2:0 en il gol vit.

Ils ZSC Lions avevan finì la qualificaziun tut auter che persvadent sin plaz set. En ils playoffs han els dentant lura eliminà l'emprim il EV Zug (2.), lura il campiun vegl il SC Berna (1.) ed uss era Lugano (4.).

Cun l'onn nov ha il club turitgais dentant midà ora il trenader, enstagl da Hans Wallson è dapi lura Hans Kossmann stà l'um vi da la banda. Ed il Canadais ha chattà il recept, per far ord ina truppa cun bler talent era ina squadra abla da giugar bain en ils playoffs. Kossmann po dentant betg cuntinuar sia lavur, la decisiun è gia crudada ch'el sto bandunar ils ZSC Lions.

RR novitads 23:00

In puck è davos la lingia dal gol e decida il campiunadi svizzer 2017/2018.
Legenda: En la setavla minuta batta Patrick Geering il goli da Lugano Elvis Merzlikins. Keystone