Siglir tar il cuntegn
Inhalt

Naziunal/Internaziunal Ils New Jersey Devils s’interessan per Gilles Senn

Tar il draft da la National Hockey League, han ils New Jersey Devils tratg en la 5avla runda il goli Gilles Senn dal HCD. El è il pick numer 129. Senn è suenter Nico Hischier gia il segund Svizzer, ch’il club da hockey american ha elegì.

Il goli Gilles Senn durant la Cuppa Spengler 2016
Legenda: Il goli Gilles Senn durant la Cuppa Spengler 2016. Keystone

Gilles Senn ch'ha 21 onns, è stà la stagiun passada en 44 partidas da la liga naziunala A en il gol dal club da hockey da Tavau. Vitiers ha el absolvì ses emprim gieu en il dress svizzer, ed il zercladur ha Senn fatg la matura cun success.

Senn ha contract fin il 2019

Sco il HCD scriva sin sia pagina d'internet, na quinta il club grischun betg che Senn bandunia gia uss la Svizra en direcziun America e NHL. D’ina vart na possia el strusch quintar da gia pudair giugar en la National Hockey League. E sco segund vegnian era ils Devils a savair, che far experientschas e progress saja meglier pussaivel en la liga naziunala A ch’en ina liga pli bassa en l’America dal Nord. E la finala haja Gilles Senn in contract cun Tavau fin il 2019, scriva il HCD.

RR novitads 06:00