Siglir tar il cuntegn
Inhalt

Naziunal/Internaziunal Il viadi vers la Russia ha cumenzà

Avant bun 9 emnas è l'aventura EURO 2016 stada a fin per la naziunala Svizra da ballape suenter la terrada en la lutga da penaltis da l’otgavelfinal encunter la Pologna. Uss ha dentant cumenzà la proxima aventura, e quella sa numna «campiunadi mundial da ballape 2018 en Russia».

Vladimir Petkovic, trenader naziunal.
Legenda: Il trenader naziunal Vladimir Petkovic mira cun optimissem en l’avegnir. Keystone

La naziunala Svizra lantscha l'aventura campiunadi mundial 2018 cun praticamain la medema equipa ch'è gia stada questa stad a l'EURO en Frantscha, ina giuvna e ferma equipa. Il pensum na vegn dentant betg pli simpel. Per ina sa qualifitgeschan be ils emprims da mintga gruppa direct per il proxim grond turnier en la Russia e per l’autra frunta l’equipa da Vladimir Petkovic en la fasa da gruppa sin il nov campiun d’Europa, il Portugal.

Petkovic sa tegn vid cuntinuitad

Quest’emna trenescha la naziunala Svizra a Feusisberg e sa prepara uschia sin l’emprim gieu da qualificaziun a chasa en il St. Jakob-Park a Basilea encunter il Portugal. Bleras midadas na vul il trenader naziunal betg far. Petkovic vul sa tegnair vid sia lingia d’enfin ussa. Megliurar vul el dentant la situaziun tar ils attatgaders, il grond problem dals Svizzers. Sco gia a l’EURO vegnan las bunas schanzas da gol simplamain betg nizzegiadas sco giavischà. Per batter il Portugal stoppia quai vegnir meglier, manegia Vladimir Petkovic.

Dus dals stars betg a Basilea

En l’emprim gieu da qualificaziun mardi, ils 6 da settember encunter il Portugal, n’è Xherdan Shaqiri betg da la partida pervia d’ina blessura. Tar ils Portugais manca il star Cristiano Ronaldo, er pervia d’ina blessura.