Siglir tar il cuntegn
Inhalt

Naziunal/Internaziunal Il HCD e la lunga pausa da campiunadi

Ils 2 da favrer ha il HCD dà il davos gieu da campiunadi. Pervia dals gieus olimpics vegn l’equipa pir puspè en acziun fin favrer. In lung temp da recreaziun, ma era in temp da savair trenar vid detagls.

IL HCD VID TRENAR
Legenda: Durant la pausa olimpica sa l'equipa dad Arno Del Curto era trenà vid detagls. RTR, GIAN CARLO CANDINAS

Cler, giugaders da hockey dattan pli gugent gieus che trenar. La pausa haja dentant era sias avantatgs, manegia il defensur dal HCD Claude-Curdin Paschoud. I saja impurtant da puspè vegnir buna furma. Ils davos quatter gieus avant la pausa olimpica ha Tavau numnadamain pers. Tranter auter era il final da la cuppa Svizra encunter Rapperswil da la Swiss League – e quai gist cun 2:7.

Nus lain chattar nossa furma durant questa lunga pausa.
Autur: Claude-Curdin Paschouddefensur dal HCD

Quatter giugaders mancan dentant al HCD durant la pausa olimpica. Andres Ambühl, Enzo Corvi e Félicien Du Bois èn en acziun cun la Svizra a Pyeongchang. E Broc Little è sin il glatsch per ils Stadis Unids da l’America.

Tenor l'attatgader Marc Wieser èsi perquai grev da trenar chaussas specificas. «Sche quatter dals megliers giugaders mancan èsi grev da trenar il powerplay u il boxplay». Dentant han giugaders pli giuvens la pussaivladad da trenar durant questas emnas cun l’emprima equipa dal HCD. Quai saja bun per els ed els possian era gia sa disar vi dal tempo pli aut.

Claude-Curdin Paschoud e Marc Wieser
Legenda: Ils davos quatter gieus avant ils gieus olimpics ha il HCD pers. Keystone

La finamira è da puspè vegnir en furma enfin fin favrer. Suenter la pausa olimpica stattan anc trais gieus da qualificaziun sin il program e lura cumenzan gia ils playoffs.

RR actualitad 11:00