Siglir tar il cuntegn

Naziunal/Internaziunal Il HCD è enavos sin il glatsch

Ils giugaders dal HCD sa chattan amez la dira fasa da preparaziun sin la nova stagiun. Suenter intgins mais cun blers trenaments da forza è l’equipa d’Arno del Curto turnada enavos quest’emna sin il glatsch.

Davent dad uss è il focus cumplettamain sin il glatsch, sut la reschia dal trenader Arno del Curto.
Legenda: Davent dad uss è il focus cumplettamain sin il glatsch, sut la reschia dal trenader Arno del Curto. Keystone

Sper ils dus gieus da test encunter il team Casac Barys Astana dat Tavau il proxim temp anc trais gieus da test encunter il CSKA Moscau ed il HC Pardubice. Il giugaders dal HCD èn leds da puspè pudair cumbatter sin il glatsch enstagl dad esser en in center da fitness e trenar forza.

Emna da trenament sin l'Alp Flex

In dals puncts culminants da la stad è dentant stà l’emna da trenament da forza sin l’Alp Flex. Davent da la civilisaziun, senza natel e televisiun, han giugaders passentà intgins bels, dentant dirs dis sin l’Alp. Quai è stà ina idea da Guido Suter, il trenader da cundiziun dal HCD. Quella emna haja oravant tut er fatg bain al spiert d’equipa.

Sut reschia dad Arno del Curto

Davent dad uss è il focus dentant cumplettamain sin il glatsch, sut la reschia dal trenader Arno del Curto. En bun sis emnas cumenza lura la nova stagiun da hockey. En l’emprima runda frunta il HCD a chasa sin il HC Fribourg Gottéron.