Siglir tar il cuntegn

Header

cuntegn

Naziunal/Internaziunal Il cas da doping Legkov e las consequenzas per ses trenader

Pervia da doping perda il passlungist russ Alexander Legkov ses titel da campiun olimpic. L’entira affera è ina tragedia per ses anteriur trenader svizzer Reto Burgermeister.

audio
Il cas Legkov è era in cas Burgermeister
ord Sportissimo dals 03.11.2017.
laschar ir. Durada: 4 minutas 8 Secundas.

Atgnamain aveva il passlungist russ Alexander Legkov encurunà il favrer 2014 sia carriera cun il titel da campiun olimpic sur 50 kilometers a Sochi. Mo quest’emna ha il Comité olimpic internaziunal IOC disqualifitgà Legkov pervia da doping. El perda sia medaglia dad aur sur 50 kilometers ed era quella d’argient cun la staffetta russa. E na betg mo quai. L’IOC ha era decidì che Legkov e ss collega d'equipa Jevgeni Belov na dastgan insumma mai pli parter a gieus olimpics.

La rolla dal trenader Reto Burgermeister

L’anteriur passlungist svizzer Reto Burgermeister aveva manà Legkov sco trenader al triumf a Sochi. Curt suenter ch’Alexander Legkov era vegnì suspendì l’enviern passà provisoricamain aveva Burgermeister ditg ad RTR ch’el saja enorm trumpà da l’agir da Legkov. Quel haja agì davos ses dies. Tenor quai ch’el sappia oz saja quai stà in doping statal sistematic. Burgermeister era persvadì che ses atlet Legkov avess era gudagnà senza doping ina medaglia.

Ruinà ses bun num

L’entira affera da doping ha era nauschas consequenzas per Reto Burgermeister. Avant l’affera valeva Burgermeister sco trenader da success ch’ha manà Alexander Legkov al titel da campiun olimpic ed a la victoria dal Tour de ski. Uss restia adina in lev suspect, ses bun num è ruinà u almain na betg pli intact, malgrà ch’i na dat naginas rinfatschas da vart uffiziala e naginas inquisiziuns encunter Burgermeister.

Artitgels legids il pli savens