Il podest
- 1. Mikaela Shiffrin (USA)
- 2. Tessa Worley (Fr) +0,31
- 3. Sofia Goggia (It) +0,91
La skiunza svizra Wendy Holdener ha manchentà be piz a cup ses emprim plaz da podest en la disciplina slalom gigant. A Kranjska Gora en la Slovenia è Holdener vegnida quarta, be dus tschientavels davos la terza, la Taliana Sofia Goggia.
Gudagnà ha ina giada dapli la favurita americana Mikaela Shiffrin che manava gia suveran suenter l’emprim percurs. La finala ha Shiffrin triumfà cun in avantatg da 31 tschientavel sin la Franzosa Tessa Worley. Sofia Goggia e Wendy Holdener han gia pers bunamain ina secunda sin Shiffrin ch’ha gia gudagnà otg cursas en questa stagiun.
Las Svizras
Classadas sut las meglras 30 èn anc quatter ulteriuras skiunzas svizras. Mélanie Meillard è vegnida 12avla (+ 1.96), Lara Gut è vegnida 15avla (+ 2.07), Simone Wild è vegnida 21avla (+ 2.65) e Michelle Gisin ha terminà la cursa sco 26avla (+ 2.98).
Damaun stat sin il program a Kranjska Gora in slalom. Gronda favurita è danovamain Mikaela Shiffrin. In plaz da podest sto er esser la finamira da Wendy Holdener.
RR novitads 14:00